ایرانی صدر مسعود پزیشکیان کا پاکستان میں سیلابی تباہ کاریوں پر افسوس

ایران کے صدر ڈاکٹر مسعود پزیشکیان نے پاکستان میں حالیہ بارشوں اور سیلاب سے ہونے والی تباہ کاریوں پر گہرے رنج و غم کا اظہار کیا ہے۔ اسلام آباد میں ایرانی سفارتخانے کی جانب سے جاری کردہ بیان کے مطابق ایرانی صدر نے سماجی رابطے کی ویب سائٹ "ایکس" پر اپنے تعزیتی پیغام میں کہا کہ ایران مشکل کی اس گھڑی میں پاکستان کے ساتھ کھڑا ہے اور ہر ممکن تعاون، امداد اور ریلیف فراہم کرنے کے لیے تیار ہے۔

ایرانی صدر نے کہا کہ پاکستان ایک برادر اسلامی ملک ہے اور کسی بھی قدرتی آفت یا مشکل وقت میں ایران نے ہمیشہ پاکستان کے ساتھ کھڑے ہونے کو ترجیح دی ہے۔ انہوں نے مزید کہا کہ متاثرہ خاندانوں کی بحالی اور متاثرہ علاقوں میں زندگی کو دوبارہ معمول پر لانے کے لیے ایران تعاون کرنے میں ہرگز پیچھے نہیں ہٹے گا۔

ترجمان ایرانی سفارتخانے نے کہا کہ صدر مسعود پزیشکیان نے پاکستانی عوام اور حکومت کے ساتھ بھرپور اظہار یکجہتی کیا ہے اور جاں بحق ہونے والے افراد کے لواحقین کے لیے دلی تعزیت اور ہمدردی کا پیغام بھیجا ہے۔ ان کے مطابق ایران مشکل وقت میں اپنے برادر ملک کو تنہا نہیں چھوڑے گا بلکہ امدادی سرگرمیوں میں شریک رہے گا۔

سیلاب کے نتیجے میں پاکستان کے مختلف علاقوں میں قیمتی جانوں کے ضیاع اور مالی نقصانات پر ایرانی قیادت نے تشویش کا اظہار کرتے ہوئے کہا کہ متاثرہ خاندانوں کے غم کو کم کرنے اور ریلیف کے عمل کو تیز کرنے کے لیے دونوں ملکوں کو مل کر اقدامات کرنے ہوں گے۔

ماہرین کا کہنا ہے کہ قدرتی آفات کے دوران برادر اسلامی ممالک کی یکجہتی نہ صرف متاثرہ عوام کے حوصلے بلند کرتی ہے بلکہ خطے میں باہمی تعاون کو بھی مضبوط کرتی ہے۔ ایران کی جانب سے اس پیشکش کو پاکستان میں خیرسگالی کے جذبے کے طور پر دیکھا جا رہا ہے۔

واضح رہے کہ ایران اور پاکستان نہ صرف ہمسایہ ممالک ہیں بلکہ تاریخی، ثقافتی اور دینی رشتوں میں بھی جڑے ہوئے ہیں۔ ایسے مواقع پر ایران کی جانب سے امداد کی پیشکش دونوں ملکوں کے درمیان تعلقات کو مزید گہرا کرنے کا باعث بن سکتی ہے۔