جمہوریت، دفاع اور خودمختاری پر کبھی سمجھوتہ نہیں ہوگا: بلاول بھٹو

چیئرمین پیپلز پارٹی بلاول بھٹو زرداری نے جشن یوم آزادی کے موقع پر اپنے پیغام میں کہا ہے کہ جمہوریت، پاکستان کے دفاع اور خودمختاری پر کسی صورت سمجھوتہ نہیں کیا جائے گا۔ انہوں نے قوم کو یوم آزادی اور معرکہ حق کی مبارکباد دیتے ہوئے بے روزگاری، مہنگائی، غربت اور امتیاز کے خاتمے کی جدوجہد کو مزید تیز کرنے کے عزم کا اظہار کیا۔

بلاول بھٹو نے کہا کہ جمہوری استحکام، 1973ء کے آئین اور پاکستان کی ناقابلِ تسخیر خودمختاری پر کبھی سمجھوتہ نہیں کریں گے۔ انہوں نے کہا کہ 14 اگست کا دن ہمارے عوام کے اتحاد، ثابت قدمی اور جذبہ آزادی کی یاد دہانی کراتا ہے۔ قائداعظم کی قیادت میں ہمارے آبا و اجداد نے ایک ایسا خواب حقیقت بنایا جو بہتوں کو ناممکن لگتا تھا، یعنی ایک آزاد اور خودمختار پاکستان کا قیام، جہاں ہر شہری کو عزت، مساوات اور انصاف کا حق حاصل ہو۔

انہوں نے مزید کہا کہ پیپلز پارٹی بانیان پاکستان کے وژن کی محافظ ہے، جمہوریت کے تحفظ اور آئین کے دفاع کی جدوجہد کرتی آئی ہے، اور ایک ایسا ملک بنانے کی کوشش میں ہے جہاں مواقع سب کے لیے یکساں ہوں۔ انہوں نے کہا کہ شہید ذوالفقار علی بھٹو اور شہید بینظیر بھٹو نے اپنی زندگیاں عوام، جمہوریت اور خودمختاری کے لیے وقف کیں، اور ان کی قربانیاں آج بھی مشعل راہ ہیں۔

بلاول بھٹو نے نوجوان نسل سے اپیل کی کہ وہ نفرت اور عدم برداشت کو ختم کر کے ایک پُرامن، خوشحال اور ترقی پسند پاکستان کے لیے متحد ہوں، جمہوریت کا تحفظ کریں اور عوام کو بااختیار بنائیں۔ آخر میں انہوں نے دعا کی کہ پاکستان ہمیشہ مضبوط قومی اتحاد اور ہم آہنگی کے ساتھ دنیا میں سربلند رہے۔