برج خلیفہ پر سبز ہلالی پرچم کی روشنیوں سے پاکستان کا 78واں یوم آزادی منایا گیا

 پاکستان کے 78ویں یومِ آزادی کے موقع پر متحدہ عرب امارات کی فضا سبز ہلالی پرچم کے رنگوں میں نہا گئی جب دنیا کی بلند ترین عمارت ’برج خلیفہ‘ سبز و سفید روشنیوں سے جگمگا اُٹھی۔ یہ دلکش منظر دیکھنے کے لیے ہزاروں پاکستانی اور دیگر مسلمان بھائی دبئی میں جمع ہوئے، اور جیسے ہی برج خلیفہ نے پاکستانی پرچم اوڑھا، فضا ’’پاکستان زندہ باد‘‘ کے نعروں سے گونج اُٹھی۔ قومی ترانوں کی دھن نے شرکا کے جوش و جذبے کو مزید بڑھا دیا۔

تقریب میں متحدہ عرب امارات میں مقیم پاکستانی اپنے اہل خانہ کے ساتھ شریک تھے۔ بچوں نے قومی پرچم کے رنگوں والے لباس پہنے، خواتین نے سبز و سفید چوڑیاں سجائیں اور مردوں نے پرچم بلند کیے۔ آتش بازی کے مظاہرے نے جشن کی رونق کو دوچند کر دیا۔

شرکا کا کہنا تھا کہ آزادی ایک عظیم نعمت ہے، اور پردیس میں رہنے والے پاکستانی اس کی قدر کو بخوبی سمجھتے ہیں۔ برج خلیفہ پر یہ سبز و سفید روشنی پاکستان کے اتحاد، محبت اور شناخت کا عالمی پیغام تھی، جو دنیا کے ہر کونے میں بسنے والے پاکستانیوں کے دلوں میں ہمیشہ روشن رہے گی۔